༄༅།  །སྒྲུབ་བརྒྱུད་ཀྱི་སྙིང་པོ་རྒྱལ་དབང་དཔལ་འབྲོང་ངུར་པ་ཆེན་པོའི་གདན་རབས་གསོལ་འདེབས་བཞུགས་སོ། ། ན་མོ་གུ་རུ་རྗེ། དུས་གསུམ་སངས་རྒྱས་འདུས་པའི་སྐུ་གསུང་ཐུགས། །མི་ཤིགས་རྡོ་རྗེའི་སྙིང་པོ་བླ་ན་མེད། །ཀུན་བཟང་རྡོར་སེམས་དགའ་རབ་རྡོ་རྗེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇམ་དཔལ་བཤེས་གཉེན་ཤྲཱི་སིངྷ་དང་། །ཨོ་རྒྱན་པདྨ་མཁར་ཆེན་མཚོ་རྒྱལ་དང་། །ཁྲི་སྲོང་ལྡེའུ་བཙན་ཡེ་ཤེས་དབང་ཕྱུག་སོགས། །རྩ་བའི་བླ་མ་རྣམས་ལ་གསོལ་བ་འདེབས། །བྱིན་རླབས་ཉམས་རྟོགས་གོང་དུ་འཕེལ་བར་ཤོག །རྒྱ་གར་མཁས་གྲུབ་དྲུང་དུ་རྩོད་པ་མཛད། །རྫུ་འཕྲུལ་བཀོད་པས་པཎྜི་ཏ་རྣམས་ཕམ། །དམ་ཆོས་ཆེན་པོ་གསང་སྔགས་ཆོས་ཆར་ཕབ། །དགའ་རབ་རྡོ་རྗེའི་ཞབས་ལ་གསོལ་བ་འདེབས། །

  ༄༅། །འབྲོང་ངུར་ཆོས་རྗེ་སྐྱེ་འཕྲེང་རིམ་བྱོན་གྱི་གསོལ་འདེབས།   མི་མཆོག་དུས་གསུམ་མཁྱེན་པས་རྗེས་བཟུང་ཞིང་།། མདོ་སྔགས་བསྟན་པའི་རྒྱལ་མཚན་ཆོས་ཀྱི་རྗེ།།   སྐལ་ལྡན་མང་པོ་སྨིན་གྲོལ་ལམ་ལ་བཀོད།། འགྲོ་མགོན་གངས་པའི་ཞབས་ལ་གསོལ་བ་འདེབས།།   དད་བརྩོན་ཤེས་རབ་བློ་གྲོས་ནོར་གྱིས་ཕྱུག། དགོས་འདོད་ཀུན་འབྱུང་འགྲོ་མགོན་ཆོས་ཀྱི་རྗེ།། ཡོ་ག་རྣམ་གསུམ་མཁྱེན་པའི་དཀྱིལ་འཁོར་རྒྱས།། གྲགས་པ་རྒྱལ་པོའི་ཞབས་ལ་གསོལ་བ་འདེབས།།

འབྲོང་ངུར་ཆོས་རྗེ་སྐུ་ཕྲེང་དང་པོ་འགྲོ་མགོན་གངས་པ། 

༄༅།  །སྒྲུབ་བརྒྱུད་ཀྱི་སྙིང་པོ་དཔལ་གྱ་བ་འབྲོང་ངུར་པ་རིམ་པར་བྱོན་པའི་རྣམ་ཐར་ཐར་པ་དང་ཐམས་ཅད་མཁྱེན་པར་འདྲེན་པའི་གྲུ་གཟིངས་ཞེས་བྱ་བ་བཞུགས་སོ།། རྩོམ་པ་པོ་ཝ་ཐང་དབུ་རྒན་དམ་ཆོས།   རྩ་བརྒྱུད་བླ་མ་རྒྱལ་བ་རྒྱ་མཚོ་དང་། །རིགས་གསུམ་སེམས་དཔའི་རྣལ་རོལ་འབྲོང་ངུར་པ། ། ཚེ་རབས་ཀུན་ཏུ་ཡིད་ཀྱི་འོ་མཚོར་རོལ།། མཆོག་མཐུན་དངོས་གྲུབ་སྩོལ་ལ་བཀའ་གནང་སྩོལ། །   ཅེས་རྗེ་རིན་པོ་ཆེ་སྐུ་ཕྲེང་རིམ་བྱོན་གྱི་རྣམ་པར་ཐར་པ་དཔག་ཏུ་མེད་པ་དང་སྐྱེས་རབས་ཀྱི་དབང་དུ་བྱས་ན་སངས་རྒྱས་མར་མེ་མཛད་ཀྱི་སྐབས་ནས་ཉ་པའི་བུ་ཆུང་སྤང་ལེབ་འཛིན་སོགས་བྱང་སེམས་ཀྱི་རྣམ་རོལ་གྲངས་ལས་འདས་པ་དང་། བདག་ཅག་གི་སྟོན་པའི་སྤྱན་སྔར་བྲམ་ཟེ་ཧ་ལུ་པ་སོགས་དང་། སངས་རྒྱས་གཉིས་པ་པདྨ་འབྱུང་གནས་ཀྱི་སྤྱན་སྔར་ལོ་ཙཱ་བ་སྭ་ཡེ་ཤེས་སྙིང་པོའི་སྐྱེ་བ་བཞེས་ཤིང་། ཞི་ཁྲོ་ཕུར་གསུམ་མན་ངག་དང་བཅས་པ་གུ་རུ་རིན་པོ་ཆེ་ལས་ཞུས་ནས་སྐྱེ་བ་བརྒྱ་དང་བརྒྱད་བར་འགྲོ་བའི་དོན་བགྱིད་དགོས་པར་གུ་རུ་རིན་པོ་ཆེས་ལུང་བསྟན་པ་སོགས་དཔག་ཏུ་མེད་པ་ལས། འདིར་དཔལ་སྒྲུབ་བརྒྱུད་ཀྱི་སྙིང་པོ་གྱ་བ་གངས་པ་རིན་ཆེན་འོད་ཟེར་ཞེས་ཡོངས་སུ་གྲགས་པ་དེ་ཉིད་ཀྱི་སྐྱེ་བ་བཞེས་པ་ནས་བཟུང་འབྲོང་ངུར་ཆོས་རྗེ་ཞེས་སྐུ་ཕྲེང་རིམ་པར་བྱོན་པ་དག་གི་རྣམ་ཐར་ཉུང་ངུ་རྣམ་གསལ་བྱས་ཏེ་དགོད་པ་ཡིན་ནོ། །

༄༅། །སྟོང་ཉིད་ལུང་བསྟན་དང་རྡོ་རྗེའི་བརྡ་རྟགས་བཞུགས་སོ། །   ༄༅། །ཨེ་མ་ཧོ། །སྣང་བ་ཡབ་ལ་སྟོང་པ་ཡུམ། །སྣང་སྟོང་རིག་པའི་མཁར་སྒོ་ནས། །ཉི་མའི་འཆར་སྒོ་ཤར་ནས་ཤར། །ལྷོ་འགྲོ་དྲུག་བདེ་བའི་ཆར་ཞིག་བབས། །ནུབ་ཆུ་འཛིན་སྤྲིན་དཀར་གཡོ་ཞིང་འགུལ། །བྱང་ཕྱོགས་གཡུ་ཡི་ན་བུན་འཐིབས། །དབུས་ན་འཇའ་འོད་གུར་ཁང་ཕུབས། །འཇའ་གུར་དེ་ཡི་ནང་ཤེད་ན། །སེང་ལྕམ་གླིང་སྒྲ་ལྷངས་སེ་ལྷང༌། །རྔ་དུང་རོལ་མོ་འུ་རུ་རུ། །དར་གྱི་ཅོད་པན་སྤུངས་སེ་སྤུང། །རུས་པའི་རྒྱན་ཆ་ཁྲ་ལ་ལ། །དེ་འདྲ་ཤར་བའི་སྣང་བ་ལ། །སྐད་ཅིག་གཅིག་གི་གོང་ཐོག་ལ། །ཉི་མ་ཤར་གྱི་ཕྱོགས་རོལ་ནས། །མེ་ཞགས་འཁྱིལ་བའི་ནང་ཤེད་དུ། །མི་དམར་རྟ་དམར་ཡབ་ལེ་བ། །མདོག་དམར་གཤིན་རྗེའི་ཞལ་ངོ་ཅན། །དཔྲལ་བ་མི་མགོའི་ཏོག་གིས་བརྒྱན། །དབུ་ལ་སྦྲུལ་གྱི་ཆུན་པོས་བཅིངས། །གཡོན་པས་མི་སྙིང་དམར་པོ་ཁྱེར། །དབུགས་ཀྱི་རླངས་པ་ཀྱི་ལི་ལི། །སྐུ་ལ་བེར་ཆེན་དམར་པོ་གསོལ། །དེ་ལ་དུག་གི་རླངས་པ་འཁྲིགས། །སྙིང་ཁ་ཐུགས་གསལ་མེ་ལོང་བཏགས། །སྐུ་གསུང་ཐུགས་ཀྱི་ཡི་གེ་གསུམ། །ཕོ་རྒྱུད་པུས་མོ་གཡས་པ་རུ། །ཡི་གེ་ཧྲཱི་ཡིག་དམར་པོ་གསལ། །མོ་རྒྱུད་པུས་མོ་གཡོན་པ་ལ། །ཡི་གེ་བྷྱོ་ཡིག་ནག་པོ་རྔམ། །ཞབས་ལ་སྟག་ལྷམ་རི་མོའི་ནང༌། །ཧཱུྃ་ཕཊ་རྒྱོབ་སོད་བརྡ་ཡིག་གསལ། །