ཆོས་སྲིད་རྣམ་དབྱེའི་ཟུར་རྒྱན།
ཆོས་སྲིད་རྣམ་དབྱེའི་ཟུར་རྒྱན།
སྲིད་པ་རྣམས་ཀྱིས་ཆོས་ལ་ཇུས་གཏོགས་བྱེད།།
ཆོས་པ་རྣམས་ཀྱིས་སྲིད་ཀྱི་རྐུབ་སྟེགས་འཛིན།།
ཆོས་སྲིད་ཕན་ཚུན་ལག་ཆར་བྱེད་ཙ་ན།།
གཉིས་ཀ་ཉམས་པ་ལོ་རྒྱུས་དཔང་པོར་གདའ།།
ཆོས་པས་སྲིད་ཀྱི་རྐུབ་སྟེགས་འགྲན་པ་དང་།།
སྲིད་པས་ཆོས་ལ་དགག་རྟོག་བྱེད་པ་སོགས།།
སྐལ་མེད་ས་རུ་སྐེ་རིང་བསྲིངས་བྱས་པས།།
སྐེ་རིང་ས་ལ་ལྷུང་བ་ཉུང་ཉུང་མིན།།
ཆབ་སྲིད་འདི་ཡང་བསམ་གྱིས་མི་ཁྱབ་གཅིག།།
ཆོས་རིག་འདི་ཡང་བསམ་གྱིས་མི་ཁྱབ་གཅིག།།
བསམ་གྱིས་མི་ཁྱབ་ཁུར་ཆེན་གང་གཉིས་པོ།།
སྟབས་གཅིག་གང་ཟག་ཕལ་གྱིས་སྤྱོད་ཡུལ་མིན།།
ཆོས་པ་རྣམས་ཀྱིས་ཆོས་ལ་བརྩོན་གྱུར་ཅིང་།།
སྲིད་པ་རྣམས་ཀྱིས་སྲིད་ལ་འབད་གྱུར་ན།།
ཆོས་སྲིད་གཉིས་ཀ་བཙན་པོའི་སྐབས་བཞིན་དུ།།
དར་ཞིང་རྒྱས་ལ་རིང་པོར་མི་འདུག་གོ།
རྡ་རམ་ས་ལའི་སྲིད་ཀྱི་རྐུབ་སྟེགས་སྟེང་།།
ངུར་སྨྲིག་གྱོན་པའི་ཤཱཀྱའི་བཙུན་པ་འགའ།།
སྲིད་ཀྱི་སྐད་ཆ་ངར་ངར་ཤོད་ཙ་ན།།
རྟགས་ཙམ་འཛིན་པའི་དུས་ལ་སླེབས་སམ་སྙམ།།
སྤྱི་ལོ་ ༢༠༡༢ ཟླ་ ༡༡ ཚེས་ ༢༤ ཉིན་འབྲོང་ངུར་ཕོ་ཉའི་རྩོམ་ཡིག་ཆོས་སྲིད་རྣམ་དབྱེའི་ཟུར་རྒྱན་དུ་བྲིས།
ཆོས་པས་ཆོས་སྒྲུབ་སྲིད་པས་སྲིད་བསྒྲུབ་ལ།།
ཆོས་སྲིད་གཉིས་བར་འཐབ་རྩོད་དགོས་དོན་མེད།།
རང་རང་ས་ནས་རིགས་གཅིག་རྐང་འཛིན་གྱིས།།
འབངས་ལ་བདེ་སྐྱིད་བསྐྲུན་དགོས་གཞན་དུ་རྨོངས།།
ལྡུམ་རའི་ནང་གི་མེ་ཏོག་དཀར་པོ་དང་།།
ལྡུམ་རའི་ནང་གི་མེ་ཏོག་དམར་པོ་གཉིས།།
རང་རང་ས་ནས་གཅེས་སྐྱོང་ལེགས་བྱས་ན།།
སྐྱེ་བོའི་མིག་ལ་མཛེས་པ་མི་ཆེ་འམ།།
ཆོས་ཀྱིས་སྲིད་ལ་རམ་འདེགས་བྱེད་པ་དང་།།
སྲིད་ཀྱིས་ཆོས་ལ་ཕན་གྲོགས་བྱེད་པ་ལ།།
རང་རང་ས་ནས་བྱེད་སྟངས་བྱེད་ལུགས་ཤིག།།
ར་མ་ལུག་གིས་གར་ཡང་གོ་མི་ཆོད།།
གནའ་བོའི་དུས་ཀྱི་ཆོས་སྲིད་ཟུང་འབྲེལ་གཅིག།
དེང་གི་དུས་ཀྱི་ཆོས་སྲིད་ཟུང་འབྲེལ་གཉིས།།
ད་དུང་དེ་གཉིས་བར་གྱི་ཟུང་འབྲེལ་གསུམ།།
ཆོས་སྲིད་ཟུང་འབྲེལ་འདི་ཡང་དཀའ་རྙོག་ཅིག།།
ང་རང་ལུགས་ཀྱི་ཆོས་སྲིད་ཟུང་འབྲེལ་གཅིག།།
སྐུ་ཉིད་ལུགས་ཀྱི་ཆོས་སྲིད་ཟུང་འབྲེལ་གཉིས།།
ད་དུང་གཞན་གྱི་ཆོས་སྲིད་ཟུང་འབྲེལ་གསུམ།།
ཆོས་སྲིད་ཟུང་འབྲེལ་འཇོག་ཚུལ་ཤིན་ཏུ་མང་།།
གནའ་དུས་ཁ་བའི་རླབས་ཆེན་མེས་པོ་འགས།།
ཆོས་སྲིད་ཟུང་དུ་སྦྲེལ་ནས་འབངས་མི་བསྐྱངས།།
གཅིག་ཕན་གཅིག་གྲོགས་ཕན་པ་བསྐྲུན་པ་ཡང་།།
ཉུང་ཉུང་མ་ཡིན་མང་པོའང་ཞེ་དྲག་མིན།།
ཆོས་པས་སྲིད་ལ་གུས་བཀུར་ལོས་ཀྱང་དགོས།།
སྲིད་པས་ཆོས་ལའང་དེ་བཞིན་དེ་བཞིན་ནོ།།
མི་ཉམས་རྒྱུན་འཛིན་རང་རང་ས་ནས་བྱོས།།
མི་ཐེག་ཁུར་པོ་རྐང་ཚིགས་ལོག་པའི་རྒྱུ།།
ཆོས་པས་ཆོས་ལ་ཐོས་བསམ་སྒོམ་གསུམ་གྱིས།།
འབངས་ཀྱི་སེམས་ལ་བདེ་སྐྱིད་བསྐྲུན་ཐབས་བྱོས།།
སྲིད་པས་སྲིད་ལ་སློབ་སྦྱོང་གཏིང་ཟབ་ཀྱིས།།
འབངས་ཀྱི་ལུས་ལ་བདེ་སྐྱིད་བསྐྲུན་ཐབས་བྱོས།།
ཆོས་སྲིད་ཟུང་འབྲེལ་གོ་དོན་རྙོག་འཛིང་ཆེ།།
བདག་ནི་དེ་ལ་རྒོལ་སྒྲུབ་གང་ཡང་མེད།།
གྲྭ་བཙུན་གཟུགས་ཀྱིས་སྲིད་ཀྱི་རྐུབ་སྟེགས་སུ།།
འཚང་ཁ་བྱེད་ལ་བདག་ནི་ཡིད་མ་རངས།།
རྒྱལ་ཁབ་གང་གི་སྲིད་ཀྱི་བྱ་བ་ནི།།
གོ་སྐབས་འཚོལ་དང་རང་རྒྱལ་གཞན་ཕམ་ཟེར།།
མ་ཟད་སྲིད་ཀྱི་ལས་འདི་བསམ་མི་ཁྱབ།།
རང་གི་གོས་དང་ཁ་དོག་འཚམས་སམ་ཅི།།
བློ་བཟང་མིང་ཅན་གངས་རིའི་སེང་གེ་དེས།།
རང་གི་དཔུང་རོགས་བཀའ་བློན་འདེམ་པ་ན།།
གྲྭ་བཙུན་གཅིག་ཀྱང་མཐོང་རྒྱུ་མེད་པ་ནི།།
ཅི་འདྲའི་ཡིད་འོང་མིག་ལྟོས་གསར་པ་ཞིག།།
གངས་རིའི་ལྗོངས་ཀྱི་ལོ་རྒྱུས་དཀར་པོ་འདི།།
རྒྱུན་འཛིན་ཐུབ་པའི་སྨོན་པ་བདག་ལ་མཆིས།།
ད་ནི་ཕྱིན་ཆད་སྲིད་ཀྱི་རྐུབ་སྟེགས་སུ།།
དགེ་སྦྱོང་གཅིག་ཀྱང་མཐོང་རྒྱུ་མེད་ན་ཨང་།།
ཆོས་ལྡན་རྒྱལ་ཁབ་སྨན་ལྗོངས་འབྲུག་ཡུལ་ན།།
ཆོས་སྐྱོང་སྲིད་སྐྱོང་ཁ་ཁ་སོ་སོར་མཆིས།།
གྲྭ་བཙུན་རྣམས་ཀྱིས་སྲིད་ཀྱི་རྐུབ་སྟེགས་ཕྱིར།།
འགྲན་རྩོད་ལྟ་ཅི་འོས་ཀྱང་འཕེན་མི་བྱེད།།
གྲྭ་པའི་གཟུགས་ཀྱིས་སྤྱི་འཐུས་བཀའ་བློན་སོགས།།
བྱེད་པ་འདི་ནི་ངོ་མ་ཡ་མཚན་ཞིག།།
བྱེད་སྲོལ་འདི་ལ་རྒྱལ་བ་རྣམ་གཉིས་ཀྱིས།།
སྔ་ཕྱིར་མཇུག་བསྡོམས་བརྒྱབས་པ་མ་བརྗེད་ཨང་།།
གངས་རིའི་ཕྲུ་གུ་སྐལ་བཟང་རབ་རྒྱས་ཁྱེད།།
རྩོམ་ཡིག་ཆུ་མོ་བཞུར་བཞུར་རྒྱུན་དུ་ཕྲིས།།
མིང་མཐའ་འདྲེན་ཚུལ་དག་ཆ་ནོར་བ་སོགས།།
རྗོད་བྱེད་ཚིག་ལ་སྐྱོན་ཆ་འགའ་ཞིག་མཆིས།།
སྤྱི་ལོ་ ༢༠༡༢ ཟླ་ ༡༡ ཚེས་ ༢༥ ཉིན་གངས་ཕྲུག་སྐལ་བཟང་རབ་རྒྱས་ཀྱི་མཆན་ལན་དུ་བྲིས།
བསམ་ཚུལ་ཕྲིས།