མེ་ཏོག

མེ་ཏོག

 

རྒྱ་སེ་མེ་ཏོག་ཚེར་སྡོང་རྩེ་ལ་འཁྲུངས།།

ཕྱིར་མིག་བལྟས་ན་ཚེར་སྡོང་རིང་པོ་ཞིག།།

ད་དུང་ཚེར་སྡོང་རྩེ་ན་འཛུམ་དམུལ་དམུལ།།

རྒྱ་སེ་མེ་ཏོག་མཛེས་པ་ཀུན་གྱི་ཏོག།

 

རྒྱ་སེ་མེ་ཏོག་ཚེར་སྡོང་རྩེར་ཡོད་ཀྱང་།།

ད་དུང་འཛུམ་པའི་འདབ་མ་ལྷུག་ལྷུག་གྲོལ།།

ཉེ་སར་བཅར་བའི་སྐྱེས་བུ་སུ་ལ་ཡང་།།

མགོ་ལྕོག་ལྡེམ་ལྡེམ་མཛེས་པའི་ཉམས་འགྱུར་སྟོན།།

ཉི་དགའ་མེ་ཏོག་ལྕུག་ཕྲན་སྡོང་བུར་འཁྲུངས།།

ཕྱིར་མིག་བལྟས་ན་ལྕུག་ཕྲན་རིང་པོ་ཞིག།།

ད་དུང་ལྕུག་ཕྲན་རྩེ་ན་འཛུམ་དམུལ་དམུལ།།

ཉི་དགའ་མེ་ཏོག་མཛེས་བཅུད་གཉིས་དང་ལྡན།།

 

ཉི་དགའ་མེ་ཏོག་ལྕུག་ཕྲན་རྩེར་ཡོད་ཀྱང་།།

དགའ་གུས་འཛུམ་བཅས་ཉི་མའི་ཟེར་ལ་ལྟ།།

མིག་མཛེས་རོ་བཅུད་ཡོན་ཏན་མཆོག་མངའ་ཡང་།།

མགོ་ལྕོག་ལྕོག་ལྡེམ་ལྡེམ་གུས་པའི་ཉམས་འགྱུར་སྟོན།།

 

ཐག་འཁྱུད་མེ་ཏོག་ཤིང་ཐག་རྩེ་མོར་འཁྲུངས།།

ཕྱིར་མིག་བལྟས་ན་ཐག་འཁྱུད་རིང་པོ་ཞིག།།

ད་དུང་ཐག་འཁྱུད་རྩེ་ན་དགོད་ཤིག་ཤིག།།

ཐག་འཁྱུད་མེ་ཏོག་ལྷན་ཚོགས་སྙིང་ལ་རྗེ།།

 

ཐག་འཁྱུད་མེ་ཏོག་ཐག་འཁྱུད་རྩེར་ཡོད་ཀྱང་།།

འཛིང་རྙོགས་དཀྱིལ་ནས་སོ་ཕྲེང་ཟེའུ་འབྲུ་དགོད།།

ཕྱོགས་བཞི་མཚམས་བརྒྱད་དམ་དུ་བཀྱིགས་ན་ཡང་།།

མགོ་ལྕོག་ལྡེམ་ལྡེམ་སྤོབས་པའི་ཉམས་འགྱུར་སྟོན།།

 

གནས་མཆོག་རྡོར་གདན་དུ། འབྲོང་ངུར་ཆོས་རྗེས། ༢༠༡༢།༠༢།༢༥ ཉིན་བྲིས།